Latgalīšu volūdai daškierts starptautiskais kods

2010.goda 18.janvarī par storptautiskuo standarta ISO639-3 uztureišonu atbildeiguo instituceja “SIL International” (ASV) ir daškieruse latgalīšu volūdai sovu individualū kodu, kas sastuov nu treju burtu: LTG

Vēļ 2009.goda vosorā 7.julī tyka īsnīgts pīprasejums itaida koda dašķieršonai. Pīprasejuma autors beja Juoņs Eisaks, kas sevi raksturoj kai “dulnu entuziastu-breivmuokslinīku”, bet reizī ari izsoka sovu redzīni par  itaida koda dašķieršonys nūzeimi: “Tys paver jaunys īspiejis latgalīšu volūdys lītuošonai  modernuos informacejis tehnologejuos i padora īspiejamu latgalīšu volūdys atbolsta izstruodi biroja programaturai (pareizraksteibys puorbaude, sinonimu vuordineica i.c.), elektroniskīm vuiceibu leidzeklim itml. Guodojams, ka tys varātu atvīgluot latgalīšu literaruos volūdys tuoluokū standatizacejis procesu.”

J.Eisaka iniciativu tūlaik atbaļsteja Juris Cibuļs (Tīslītu ministrejis Vaļsts volūdys centrs), Ilga Šuplinska, Sanita Lazdiņa i Heiko F. Martens (visi Rēzeknes Augstsškola), Juris Viļums (Dagdys nūvoda dūmes deputats) i Imants Slišāns (Latgalīšu volūdys, literaturys i kulturviesturis školuotuoju asociaceja). Ar pylnu pīprasejuma tekstu angļu volūdā var īsapazeit Latgalīšu Kulturys gazetā – lakuga.lv

Ziņa par itaida koda daškieršonu ir aktiviziejuse ari iz pasauļa popularys interneta enciklopedejis “Wikipedia.org” sekuotuojus – ir atsuokts dorbs pi ituo resursa izveides ari latgalīšu volūdā, da itam beja izstruoduota tikai parauga versija (http://incubator.wikimedia.org/wiki/Wp/ltg).

Jūprūjom ir aktuals latgalīšu volūdys tuoluokais liktiņs. Jemūt vārā tryukumus Latvejis vaļsts lykumdūšonā, kai ari 8.decembra zynuotniskuos diskusejis “Latgales latviešu valoda Latvijas valodas politikas kontekstā”, kū reikova LU Latvīšu volūdys instituts, rezuļtatus, LatBLUL (Latvejis Regionalūs i mozuok lītuotūs volūdu savīneiba) īrūsynoj izveiduot dorba grupu: juridiskūs terminu preciziešonai i dokumentu sagataviešonai regionaluos volūdys statusa daškieršonys īspiejai; pasuokumu programmys izstruodei, kas ļautu suokt eistynuot Vaļsts volūdys lykuma 3.panta 4.apakšpunktā nūsaceitū: „Valsts nodrošina latgaliešu rakstu valodas kā vēsturiska latviešu valodas paveida saglabāšanu, aizsardzību un attīstību” kai ari vajadzeigūs dokumentu sagataviešonu i īsnīgšonu izskateišonai atbiļdeigajuos institucejuos, kas uzdūtu vajadzeibu kotrā Latgolys školā vuiceit latgalīšu volūdu, literaturu i kulturviesturi.

Latgolys planavuošonys regiona atteisteibys padūme 2009.goda 18.decembra sēdē (Dagdā) jau ir pījēmuse lāmumu i dorba grupā izvirziejuse Latgolys pašvaļdeibu puorstuovi Ināru Silicku (Kuorsovys nūvoda dūme). Tuoluokuo reiceiba teik gaideita nu Izgleiteibys i zynuotnis ministrejis.

Informaceji sagataveja:

Dagdys nūvoda pašvaļdeibys sabīdriskūs attīceibu i komunikacejis nūdaļa

info(at)dagda(dot)lv, 65681726