Dagdys nūvods duovonā sajem vierteigys gruomotys

Rēzeknis Augstškola duovynoj Latgolys pašvaļdeibom projekta „Latgales etnolingvistiskās situācijas izpēte“ ītvorā izdūtū monografeju „Valodas Austrumlatvijā: pētījuma dati un rezultāti“.

Apjūmeigū gruomotu (466 lpp.) dreizumā sajims kotra Dagdys nūvoda pogosta puorvaļde. Juoatzeimej, ka projektā pīsadaleja 9076 respondenti i 145 intervietuoji. Ari myusu novodā: apvaicuoti 382 cylvāki (Dagdā, Šķaunē, Ezernīkūs, Ondrupinē, Andzeļūs, Osyunā, Svariņūs, Bērziņūs i Ķepovā).

 

Tys ir pyrmais pietejums, kas tik vysaptverūši atkluoj Latgolys īdzeivuotuoju volūdu prasmi, lītuojuma sferys, attīksmi pret dažaidom volūdom, nūruoda iz religejis, tauteibys i volūdys vītu cylvāka identitatē.

 

Monografeja topuse augleiga virtualuo dorba rezuļtatā sadarbeibā ar dažaidu vaļstu zynuotnīkim (Italeja, Latveja, Igauneja). Redaktores – Sanita Lazdiņa i Ilga Šuplinska (RA) – stuosta, ka itymā reizē akcents tyka lykts iz lītišķuo pietejuma praktisku izmontuošonu regiona volūdys, kulturys i izgleiteibys politikys planavuošonā. Monografeja ir zynuotnīku kūpdorbs četru godu garumā, atkluojūt sociolingvistiskuo pietejuma metodologeju i projekta gaitu.

 

Zinuotnīku individualajūs pietejumūs apsavārti identitates vaicuojumi, volūdys politika i volūdu diskriminacejis problematika, izvirzāti konkreti prīšklykumi regiona atteisteibys optimizacejai. Kai atzyna projekta Italejis partneri, tod taišni individualī pietejumi ir vierteiguokuo monografejis daļa. Monografejā ir dūtys ari  gotovys anketys trejuos volūduos (latvīšu, latgalīšu, krīvu), kas varātu tikt izmontuotys leidzeigim pietejumim. Dorba rezuļtati paruoda volūdys situaceju Latgolā i latgalīšu volūdys funkcionalitati myusu regionā.

 

Informaceju sagataveja: Dagdys nūvoda pašvaļdeibys Sabīdriskūs attīceibu i komunikacejis nūdalis vadeituojs Jurs Viļums, juris.vilums@dagda.lv